Meron akong isang Mundo

Meron akong isang mundo, tahimik ito at minsan magulo

Meron akong isang mundo, dito panatag ako at ako ay totoo

sa mundo ko lahat ay makulay datapwat totoong buhay minsan’y sablay

ang maliwanag na dilaw nangingitim walang ibang maaninag kundi dilim

sa kadahilanang ako’y bahagi ng mundo hindi mapigilang kahit ang aking binuo

minsan ay nagagayang walang kulay rin binabalot ng ulap na makulimlim

Meron akong isang mundo at ako ay doon nakatago

nagkukubli, nagmumuni, hinihintay ang aking naglalakbay na sarili

doon lang ako nakaupo, nakatingala sa langit at malayong dako

puso ko ay taimtim na humihiling, mga  mata masuwerteng hindi nakapiring

Meron akong isang mundo, dito ay nakakapag isip ako

Pinupuno ng ngiti ang bawat sulok kahit sa labas ay nakalugmok

tahimik lang akong nakikinig, sa bulong ng hangin at sa himig

pinakikinggan ang isip ko na may sariling tinig.

Mga ninanais ng isip na iparating, sa sulat idinadaing

Waring piping ang alam lamang gawin, sumenyas at umiling

Hindi ako makata alam ko, mundo ko ay binabalot lang ng alaala

Sa mga sulat kong mahiwaga nalalabas, mahalagang damdaming hindi masalita

Meron akong isang mundo, ninanais punuhin ng letra at artikulo

Kasama ng mga walang kabuluhang litrato, ako lang ang nakakapagtanto

Ninanasang maintindihan ng iba, kung ano nga ba ang nasasaloob

Subalit may puso rin ako, nadadapa at hindi palaging malakas sa harap niyo

Meron akong isang mundo, gusto kong palaging maging makulay ito

Gusto kong ipinta at iguhit sa globo, kung ano nga ba ang buhay ko

Nais kong ang nakikita ko ay siya ring makita mo

Ang nagpapangiti sa kin ay siya ring magdala ng kulay at ngiti sa iyo

Sa mundo ko lahat ay halo halo, binabalot ng hiwaga at ng kung ano

Marahil alam mong hindi ako perpekto, malayo at nahihibang na siguro ang ulo

Ngunit maging ang mga luha ko ay may kulay na nais ring ipabatid

Sa bawat patak nito, binibigyan ko ng kabuluhan ang buhay ko

Di lang basta lungkot at pait, kundi mga obrang sa gitna ng hinagpis lamang napipilit

Meron akong isang mundo, at dito nagkukubli kung ano nga ba ang totoo.